Përgjatë kësaj jave Agjencia Kundër Korrupsionit ka hapur dyert për rreth 150 nxënës të Shkollës së Mesme “Hoxhë Kadri Prishtina”, të cilët kanë pasur mundësinë të njihen me mënyrën e funksionimit të Agjencisë dhe jenë pjesë e ligjëratave mbi fushë veprimtarinë dhe punën e saj.
Stafi drejtues dhe zyrtarë të Agjencisë kanë informuar grupet e nxënësve mbi misionin, mandatin, rolin dhe përgjegjësitë e Agjencisë Kundër Korrupsionit, praktikat dhe procedurat e punës në parandalimin dhe luftimin e korrupsionit, mekanizmit ekzistues dhe aspektet e bashkëpunimit me qytetarë dhe bashkërendimit të veprimeve me organizata dhe institucionet tjera. Nxënësit janë shoqëruar që t’i vizitojnë edhe ambientet e punës së zyrtarëve të Agjencisë.
Gjatë seancave të pyetjeve për udhëheqësit e Agjencisë, nxënësit kanë shfaqur interesim për tema të ndryshme që ndërlidhen me korrupsionin si dhe për burimet njerëzore të Agjencisë për të trajtuar me efikasitet të gjitha rastet e dyshuara të korrupsionit.
Vizita e nxënësve të Shkollës së Mesme “Hoxhë Kadri Prishtina” është realizuar në vazhdën e aktiviteteve të Agjencisë Kundër Korrupsionit për zgjerimin e partneritetit me institucionet arsimore që kanë për synim rritjen reciproke të standardeve profesionale përmes një bashkëpunimi të strukturuar.
